ناس كتير لما تحب تبدأ في تشطيب منزلها الخاص مش بتبقي عارفه تبدأ منين وايه الترتيب الصحيح لمراحل التشطيب وترتيب المراحل ده بيوفر وقت ومجهود وبتكون اعمال التشطيبات عملية فيها سلاسة وراحة أثناء التنفيذ وعشان كده هنحاول نساعدك ازاي تقدر تشطب شقتك بطريقة صحيحة.
أولا :- انت عاوز ايه ؟
لازم ترفع مقاسات الوحدة الخاصة بيك وترسمها وتحط الفرش بتاعك والأجهزة الكهربائية والأجهزة الصحية اللي انت عاوزها بمقاساتها علي الرسم .
بحيث يبقي عندك تصور كامل لمنزلك زي ماانت عاوزه وعلي اساس كده بنبتدي اعمال التشطيبات بالتأسيس لأعمال الكهرباء والسباكه والتكييفات .
وبنحدد أماكن أعمال الكهرباء (مفاتيح , برايز, لوحة , أباليك , إناره ,..) ليتم التأسيس لها .
واماكن الاجهزة الصحية (حوض , قاعدة , بانيو ,…) حتي يتم البدء في اعمال التغذية والصرف لأعمال السباكه .
وتحديد اماكن التكييفات ليتم التأسيس لها .
ولو عندك غاز لازم ننسق مع شركة الغاز مكان البوتجاز والسخان ودي تعتبر أول واهم مرحله في اعمال التشطيبات واللي هيتبني عليها بعد كده باقي المراحل .
ثانيأ :- أعمال تأسيس التكييفات
احيانا بنحتاج نعمل مواسير مدفونة للتكييفات وده بيتحدد علي اساس مكان وحدة التكييف فين .
ولذلك بناء علي مكان وحدات التكييف الداخلية بيتحدد مكان الصرف والكهرباء اللازمة لكل تكييف ودي تعتبر المرحلة الثانية في اعمال التشطيبات .
ثالثاً :- اعمال تأسيس الكهرباء
المرحلة الثالثة في اعمال التشطيبات هي أعمال تمديدات وتأسيس الكهرباء بناء علي الرسم الهندسي اللي عملناه في المرحله الأولي وعلي أساسه حددنا اماكن المفاتيح والبرايز واللوحة والإضاءة .
في المرحلة دي بنشتري السلك ولازم نجيب سلك جودة عالية والخراطيم والعلب الماجيك واللوحة .
ناخد بالنا لو الشقة علي الطوب بيتم تثبيت العلب الماجيك علي بؤج المحاره يعني بتاع المحارة يدخل يعمل البؤج بتاعته وميملاش إلا بعد لما بتاع الكهرباء يخلص .
لكن لو حضرتك مستلم الوحدة علي المحارة فهيتم أعمال التكسير لتركيب العلب والخراطيم وبعد كده هنجيب بتاع المحارة يلم المرمات دي ولازم تتعمل بشكل صحيح .
رابعاً :- اعمال المحارة
(المرحلة الرابعة في اعمال التشطيبات هي المحارة لو انت مستلم منزلك علي الطوب)
- في الاول بيتم عمل الطرطشة ثم التربيع وعمل البؤج .
- بعد عمل البؤج وقبل الملو بيدخل النجار يركب الحلوق الزفرة للأبواب والشبابيك .
- وبيدخل بتاع الكهرباء يعمل المرحلة السابقة وبعد كده بيتم عملية الملو ونهو البند .
بند المحاره من البنود المهمة في اعمال التشطيبات واللي لازم تستلمها بطريقة صحيحية لأنه بيأثر علي جودة اعمال الدهانات تأثير مباشر .
خامساً :- اعمال عزل الحمامات و تأسيس اعمال السباكة
المرحلة الخامسة في اعمال التشطيبات بيتم فيها اولاً :-
- نظافة الحمامات المراد عزلها وعمل رقبة زجاجة بين الحوائط والأرضيات وتسوية سطح الأرضيه جيداً .
- عمل عزل للحمامات من لفائف البيتومين المؤكسد والمسلح بالبوليستر .
- يتم اختبار العزل بملو المياه في الحمام والتأكد من عدم وجود أي تسريبات .
- عمل طبقة لياسة من المونة لحماية العزل .
- عمل تمديدات مواسير الصرف والتغذية والتأسيس للأعمال الصحية بناء علي الرسم اللي تم عمله في المرحله الاولي .
- يجب عمل اختبار كبس لمواسير التغذية والتأكد من عدم وجود أي تسريب بها
- اختبار مواسير الصرف والتأكد من عمل ميول كافية لها.
سادساً :- اعمال تركيب الأرضيات والسيراميك
المرحلة السادسة في اعمال التشطيبات هي تركيب الارضيات سواء كانت من السيراميك او الرخام او البورسلين او باركيه حسب اختيارك وتركيب حوائط الحمامات والمطبخ .
وده بيعتبر من اصعب بنود اعمال التشطيبات يجب مراعاة الآتي اثناء العمل في هذا البند :-
- اختيار سيراميك او بورسلين فرز اول من شركة جيدة وفي حالة الرخام يجب ان يكون الرخام طاولات من حجر واحد حتي لايكون هناك اختلاف في اللون .
- مراعاة الميول في الحمامات لتصريف المياه .
- ان تتم اعمال ملو فواصل السيراميك بالطريقة الصحيحة خصوصا في الحمامات ولذلك يفضل استخدام المواد المصنعة لذلك من الشركات المتخصصة .
بعد إنتهاء مرحلة تركيب الأرضيات والسيراميك هتحس بتغيير كبير حصل وإن خلاص هانت وده بيعتبر الجزء الاصعب في اعمال التشطيبات .
